2009-cu ilin “Məktəblinin Biznes Günü” keçirilir
Dərc olunub: Jul 21 2009
Press Reliz >>

May ayının 26-sı, “Ambassador” otelinin konfrans zalı, saat 15.00: Gənc sahibkarlar üçün nəzərdə tutulmuş JA “Məktəbli Şirkətlər” layihəsinin ən uğurlu 63 iştirakçısı 2009-cu ilin “Məktəblinin Biznes Günü” tədbirində bir araya gələcək.

BP və onun AÇG, Şahdəniz, BTC və CQK layihələri üzrə tərəfdaşları, ABŞ-ın Beynəlxalq İnkişaf Agentliyi, StatoilHydro, Chevron və Baker McKenzie şirkətlərinin maliyyələşdirdiyi “Məktəblərdə İqtisadiyyatın Tədrisi” proqramının tərkib hissəsi olan JA “Məktəbli Şirkətlər” layihəsi Azərbaycan Respublikası Təhsil Nazirliyi ilə strateji əməkdaşlıq çərçivəsində Junior Achievement Azərbaycan təşkilatı tərəfindən həyata keçirilir.

Tədbirdə Təhsil Nazirliyi, ABŞ-ın Beynəlxalq İnkişaf Agentliyi, BP, StatoilHydro və Baker McKenzie şirkətlərinin nümayəndələri çıxış edəcək. Beynəlxalq və yerli biznes icmasının, eləcə də təhsil sektorunun nümayəndələrinin iştirakı ilə keçiriləcək tədbirə bütün media agentlikləri dəvət olunur. 
 
2008-ci ilin Dekabrında başlanan JA “Məktəbli Şirkətlər” layihəsinə Bakı, Sumqayıt, Kürdəmir, Yevlax, İsmayıllı, Şirvan, Bərdə, Ağdaş və Mingəçevirin 28 məktəbindən 175 şagird qoşulmuşdur. Layihə çərçivəsində yuxarı sinif şagirdləri müəllim və işgüzar icmanın könüllü mentorlarının köməyi ilə sahibkarlığın əsaslarını və biznes planın tərtibatını öyrənirlər.

May ayının 26-sı keçiriləcək tədbirdə Bakını, İsmayıllını, Yevlaxı, Kürdəmiri və Ağdaşı təmsil edən finalçı komandalar öz biznes plan və məhsullarını münsiflər heyətinə təqdim edəcəklər. Layihənin qalibləri 6 nominasıya üzrə münsiflərin qərarı ilə seçiləcək. 

Tədbir qalib komandaların və biznes könüllülərin mükafatlandırma mərasimi ilə başa çatacaq.