Noyabrın 10-11-də Azərbaycanın müxtəlif bölgələrindən olan 100 müəllim, JA Azərbaycan və Project Harmony təşkilatlarının keçirdiyi “Azərbaycan Məktəblərində İqtisadiyyatın Tədrisi Proqramının Lider Müəllimlərin Konfransı”nda öz təcrübələri ilə bölüşmək və iqtisadiyyatın tədrisi proqramını təcrübədən keçirmək imkanı əldə etdilər. ABŞ-ın Azərbaycandakı səfiri cənab Rino L. Harniş, Azərbaycan Respublikasının Təhsil Naziri cənab Misir Mərdanov, ABŞ BİA təşkilatının ölkə üzrə əlaqələndiricisi cənab Ceyms L. Qoqqin, yerli və xarici iş adamları və mətbuat nümayəndələri tədbirdə iştirak etdilər.

İki-günlük konfransda iştirakçılar iqtisadiyyat və biznesin tədrisi üzrə təlimlərdə, dəyirmi masa müzakirələrində yaxından iştirak etdilər və interaktiv fəaliyyət növlərində qrup işi və liderlik bacarıqlarını sınadılar. Tədbirin açılışında çıxış edən Misir Mərdanov, Səfir Harniş və JAA Direktorlar Şurasının üzvü Nikolas Blauer JAA “Azərbaycan Məktəblərində İqtisadiyyatın Tədrisi” proqramına göstərdikləri dəstəyi vurğulayaraq, Azərbaycanın inkişaf edən iqtisadiyyatı üçün iqtisadi və biznes biliklərinin əhəmiyyətindən bəhs etdilər. Açılış nitqindən sonra JAA İcraçı direktoru Vüsal Xanlarov AMİT proqramı haqqında məlumat verərək, proqramın fəaliyyətinə yerli iş adamlarının cəlb olunması perspektivini xüsusi olaraq vurğuladı.

“Azərbaycanın orta məktəblərində JA İqtisadiyyat proqramının tədrisinin əhəmiyyəti” sessiyası tətbiqi iqtisadiyyat üzrə milli olimpiada, “Məktəbli şirkətlər”, HP Global Buisiness Challenge yarışı və “Qlobal Biznes etika” kimi JA layihələrindən bəhs edirdi. “JA iqtisadiyyat proqramı iqtisadiyyat dərslərinin interaktiv metodla keçirilməsində mənbə rolunu oynayır. Şagirdlərimiz iqtisadi nəzəriyyəni öyrənir və simulyasiya tapşırıqlarında öz bilik və bacarıqlarından istifadə etmək imkanı əldə edirlər”, JAA treneri Nailə Əhmədova belə şərh etdi, “Bu iqtisadiyyat proqramı həqiqətən də gəncləri gələcək həyata hazırlayır”.

Biznes Mühiti və Biznes Etika adlı təqdimatda PricewaterhouseCoopers şirkətinin baş meneceri Teymur Abasquliyev Azərbaycanın iqtisadi vəziyyəti haqqında aydın mənzərə yaratdı, xarici investorları ölkəmizə cəlb edən əsas amilləri sadaladı və biznes etikasının əhəmiyyətindən bəhs etdi. Project Harmony təşkilatının təqdimatları zamanı iştirakçılar uğurlu onlayn layihə aparıcısı olmaq üçün əsas bacarıqlara yiyələndilər.

Tədbirin bağlanış mərasimi zamanı iştirakçılar konfrans seminarlarını uğurla başa vurduqları münasibətilə sertifikatlarla təltif olundular. “Konfrans bizlərə dərslərimizdə tətbiq edə biləcəyimiz yeni strategiya və texonlogiyaları öyrətdi və ən başlıcası yenin fikirlər axınını daha da canlandırdı”, Bakının İntellekt Liseyinin müəllimi Zarema Almazova dedi. JA Azərbaycan təşkilatı onlayn və oflayn fəaliyyət növlərinin köməyilə müəllimlər şəbəkəsi yaratmaq missiyasını davam etdirəcək.