2008

Gənc sahibkarlar mükafatlandırıldı
Dərc olunub: Jan 26 2009
2008 >>

 2008-ci ilin iyun ayının 20-si, Bakının Səbayıl, Qaradağ və Xətai rayonlarından olan 10 məktəbli komanda Junior Achievement Azərbaycan təşkilatının  “Məktəbli Şirkətlər” layihəsi çərçivəsində təşkil etdiyi sərgidə öz bizneslərini təqdim etdilər. Layihə British Petroleum və tərəfdaş şirkətlərin maliyyələşdirdiyi, Bakı koridoru zonasını əhatə edən “Məktəblərdə İqtisadiyyatın və Biznesin Tədrisi” proqramı çərçivəsində keçirilmişdir.

Aprel ayında başlanan “Məktəbli Şirkətlər” layihəsinin 2008 ilin yaz sessiyasına Bakının Səbayıl, Qaradağ və Xətai rayonlarının 100 şagirdi qoşularaq, şirkətin yaradılması və idarə edilməsinin əsas prinsiplərini öyrənirdilər. PricewaterhouseCoopers şirkətinin peşəkar təlimçilərin dəstəyilə, şagirdlər onlayn təlimlərdə iştirak edib, davamlı biznes planın yazılması üçün lazımı bilikləri əldə edərək öz məktəbləri daxilində məktəbli şirkətlər yaratmışlar.

 “Avropa” mehmanxanasında keçirilən layihənin final mərhələsində 203, 162, 50, 51, 116, 319, 294, 163, 63 və 14 saylı internat məktəbinin komandaları öz biznes plan və məhsullarını işgüzar icmanın və JA Direktoral Şurasının nümayəndələrindən ibarət münsiflər heyətinin nəzərinə təqdim etdilər. Şagirdlərin idarə etdiyi şirkətlər müxtəlif məhsul istehsalı və xidmət növləri təklif edirdi. Bunların sırasında rayonlara səfərlərin təşkili, turizm şirkəti, foto studiya, əlilliyi olan uşaqlar üçün nəqliyyat xidməti, ağac məmulatları  istehsalı, milli ornamentli əl işləri, məktəb kafesi və məktəb kinoteatrı təqdim olunmuşdur. Münsiflər şagirdlərin təqdimatlarına biznes ideyanın mümkünlüyü, maliyyə planı, risk və sığortanın nəzərə alınması və təqdimat bacarığı əsasında qiymət verirdilər. “Məktəbli Şirkətlər” və ona oxşar layihələr şagirdlərdə məktəb yaşından başlayaraq biznes bacarığının aşkarlanmasında və tətbiq edilməsində mühüm rol oynayır. Şagirdlərin bu gün bizə təqdim etdikləri ideyalar adət edilmiş əşyalara yeni, maraqlı baxışla heyrətləndirirdi; adət olunanı yeni işıqda görmək qabilliyyəti biznesdə çox vacib bacarıqdır və səni kütlədən ayırır”, bu sözləri McDermott Kaspian Kontraktor şirkətindən olan münsif cənab Tomas Or vurğuladı.  

 Tədbirin sonunda keçirilən mükafatlandırma mərasimində JA Azərbaycan təşkilatının İcraçı Direktoru Vüsal Xanlarov layihədə iştirak edən şagirdlərə, müəllimlərə və könüllü mentorlara təşəkkür edərək, layihənin onlarda özünə-inam hisslərinin artmasına kömək etdiyinə əmin olduğunu bildirdi. Qiymətləndirmənin nəticəsi əsasında Bakının 203 saylı məktəbin rayon səfərlərinin təşkili ideyası qələbə qazanaraq, 1-ci yeri əldə etmişdir. Taxta məhsullarının hazırlanması və modernləşdirilmiş məktəb masasının təqdimatına görə 116 saylı məktəb 2-ci yerə, foto şəkil studiyasının təşkilinə görə 51 saylı məktəb isə 3-cü yerə layiq görülmüşdür. Layihənin qaliblərinə qiymətli hədiyyələrlə yanaşı, JA “İşə Hazırlıq” proqramında iştirak etmək hüququ və bizneslərin yerlərdə necə işlədiyini müşahidə etmək imkanı yaradılmışdır.

- Xəbərlər arxivi 2008

- Xəbərlər arxivi 2007

- Xəbərlər arxivi 2006

- Xəbərlər arxivi 2005