Ölkəmizdə təhsil islahatlarının sürətlə həyata keçirildiyi və inkişaf etdiyi bir dövrdə, bu sahədə fəaliyyət göstərən bir çox beynəlxalq təşkilatların rolu da böyükdür. Belə bir təşkilatlardan biri də, dünya səviyyəsində kifayət qədər böyük bir nüfuza malik olan, Junior Achievement Azərbaycan təşkilatıdır. Bu təşkilat beş ildir ki, Təhsil Nazirliyi ilə səmərəli və faydalı əməkdaşlıq çərçivəsində təhsil islahatları proqramına uyğun olaraq aktiv tədris üsullarının tətbiqi yolu ilə respublikamızın orta məktəblərində "İqtisadiyyata giriş" fənninin tədris keyfiyyətinin artırılması proqramları ilə məşğuldur. Fəaliyyət göstərdiyi dövr ərzində Junior Achievement Azərbaycan təşkilatı respublikamızın müxtəlif bölgələrindən olan məktəblər ilə yaxından əməkdaşlıq edərək, onlara müxtəlif formalarda tədris-metodiki və texniki köməklik göstərmişdir. Beş il müddətində təşkilatın layihələrində 80 məktəb, 30 trener-konsultant, 200-ə yaxın müəllim, 30000-dən çox şagird iştirak etmişdir.Əgər 2000-ci ildə ilk yarandığı dövrdə Junior Achievement Azərbaycan-ın yalnız iki proqramı mövcud idisə, 2004-cü ildə bu proyektlərin sayı 10-a çatmışdır. Layihəyə daxil olan bütün pilot məktəblər təşkilat tərəfindən təmənnasız formada kompüter avadanlğı və dərsliklə təmin olunmuşdular.

Bu il də təşkilat öz proqramlarını əsaslı formada genişləndirməyi nəzərdə tutur. Belə ki, ilk addım olaraq yeni tədris ili üçün daha 50 məktəbin təşkilatın layihəsinə daxil edilməsi nəzərdə tutulur. Əvvəlki illərdən fərqli olaraq, bu məktəblər respublikamızın ucqar bölgələrini təmsil edəcəklər ki, bu da öz növbəsində JA Azərbaycan proqramlarının daha da genişlənilməsinə gətirib çıxaracaqdır. Bu məktəblər əsasən Gəncə, Mingəçevir, Sumqayıt, Əli Bayramlı şəhərlərini, həmçinin, Bərdə, Lənkaran, Quba, İsmayıllı, Qazax, Zaqatala və Ağdaş rayonunu əhatə edirlər. Hal-hazırda təşkilatın nümayəndələri bu şəhər və rayonlarda yerləşən məktəblərlə yaxından tanış olaraq yay tətili müddəti üçün "İqtisadiyyata giriş" fənni üzrə təşkil ediləcək treninq-seminarlarda iştirak edəcək müəllimlərin seçimilə məşğuldurlar. Beləliklə, yeni tədris ilindən etibarən təşkilatın pilot məktəblərinin ümumi sayı 130 olacaqdır, bu isə öz növbəsində təşkilatın proqramlarının həm məzmun, həm də aktuallıq baxımından daha da təkmilləşməsinə və inkişafına gətirib çıxaracaqdır.