PRESS RELİZ
| Peşə təhsili məktəblərindən yüz şagird Skills@Work Milli Finalında yarışacaq |
![]() |
| Dərc olunub: Jan 30 2010 |
| Press Reliz >> |
 27-28 yanvar 2010-cu il tarixlərində Junior Achievement Azərbaycan təşkilatı British Council, Azercell Telekom MMC və Microsoft Azərbaycan şirkəti ilə birlikdə Skills@Work Challenge-2010 yarışının milli finalını Grand Hotel Europe mehmanxanasında keçirəcəkdir.
Açılış tədbiri 28 yanvar saat 10.00-da, Grand Hotel Europe-un Bakı zalında başlayır və irəli sürülmüş biznes probleminə ən yaxşı həlli təklif etmək üçün bir-biri ilə yarışacaq 7 peşə-texniki məktəbindən 100 şagirdi bir araya gətirir.
Skills@Work (skilz-ət-vörk – İş üçün bacarıqlar) bütün Cənub-Şərqi Avropa ərazisi və Böyük Britaniyada peşə təhsili və təlimi sektorunda beynəlmiləlçiliyi dəstəkləyən, on səkkiz ölkəni əhatə edən bir layihədir. “Skills@Work vasitəsi ilə nail olmaq istədiyimiz peşə bacarıqlarının inkişafına işəgötürənləri cəlb edərək, sənayenin ehtiyacları ilə təhsil və təlimin vəziyyətini uyğunlaşdırmaqla mövcud çətinlikləri aradan qaldırmaqdır”, Skills@Work layihəsinin meneceri Natiq Hacıyev deyir.
British Council və JA Young Enterprise tərəfindən birgə təşəbbüs kimi həyata keçirilən Skills@Work Challenge gəncləri öz bacarıqlarından işgüzar və innovativ formada istifadə etməyə həvəsləndirməklə, son nəticədə onların işə düzəlmək imkanlarını və sahibkarlıq qabiliyyətlərini artıracaq milli və beynəlxalq yarışdır. Builki yarış eyni zamanda Cənub-Şərqi Avropanın bir çox ölkəsi və Britaniyada keçirilir.
JA Azərbaycan təşkilatının İcraçı direktoru Vüsal Xanlarov qeyd edir ki, Azərbaycanda yarışa hazırlıq 2009-cu ilin oktyabrından başlanmış, seçimlərdə Bakı və Qubadan olan 240 gənc şagirdin sahibkarlıq və komandada işləmə bacarıqları sınaqdan keçirilmişdir. Finala vəsiqə almış 20 komanda bu mərhələdə biznes ideyalarını işləyib hazırlayacaq və öz həllərini münsiflərə təqdim edəcək. Biznes nümayəndələrindən ibarət münsiflər heyəti təklif olunan ideyaları həyata keçirilə bilmə dərəcəsi, yeniliyi və komandanın təqdimat bacarığına əsaslanaraq qiymətləndirəcək. Qalib komanda 21-25 aprel 2010-cu il tarixində Belqrad, Serbiyada keçiriləcək regional Skills@Work Challenge yarışında iştirak etmək imkanı əldə edəcəkdir.
Junior Achievement Azərbaycan və British Council Azərbaycanda Skills@Work Challenge yarışının keçirilməsində əsas partnyor dəstəyinə görə Azercell Telekom MMC şirkətinə və partnyor Microsoft şirkətinə minnətdarlığını bildirirlər. |
Junior Achievement müəllim və məktəbləri konkret proqramlarla təmin edir və şagirdlərə nəzəriyyənin praktikaya keçmə yolunu, sahibkarlığın nə olduğunu anlamağa imkan verir. Bu yolla şagirdlər özlərinə inam və motivasiya əldə edirlər, daha fəal olurlar və komanda daxilində işləməyi öyrənirlər. Bu isə, Avropanın gələcəyi üçün mühüm investisiyadır.